Rebolusyonaryong ekstorsyon, banta sa eleksyon!

UMAAPELA ang AFP/PNP sa mga kumakandidato ngayong 2016 National and Local Elections na huwag tumalima sa “permit to campaign” at “permit to win” ng teroristang CPP-NPA-NDF.  Ayon kay AFP public affairs office chief Col. Noel Detoyato ang mga kabayarang hinihingi ng mga komunistang-rebelde ay tahasang extortion. Kaya siya nanawagan:  “We are (encouraging) them to report it to the Commission on Elections, to the police, to the nearest military (unit) so that we can take proper action.” (www.facebook.com/dndtv)

                Aminado ang otoridad na noong nakaraang mga eleksyon daan-daang milyong halaga ang nalikum ng mga rebeldeng komunista.  Umaabot sa P500,000 ang sinisingil sa isang kandidato o maaring tataas o bababa depende sa posisyon na tinatakbuhan.  Ang mga pondo na nalikum ay siya namang ginagamit ng mga terorista sa ma-perwisyo at bayolenteng pangangatake sa Gobyerno at mga namumuhunan.

                Sa Eastern Mindanao nitong nakaraang 2015, umabot sa “P246.12 million worth of equipment and products” (Business Mirror, 12/31/2015) ang sinira ng mga komunistang rebelde.  Batay sa report ng National Security Council (NSC) 2% ng taunang Gross Domestic Product (GDP) ang nasasayang dahil sa terorismo.  Mula 1968 (taong itinatag ng CPP) hanggang maagang bahagi ng 1980s umabot sa “$1.7 trillion of direct and consequential investments” ang nawala sa Pilipinas dahil sa walang pakundangang labor strikes, revolutionary taxations at pananabotahe ng mga teroristang rebelde (Atrocities & Lies: The Untold Secrets of CPP, NADFFI).

                Apektado man ang mga namumuhunan (kapitalista) dahil sa mapanirang pangangatake ng mga terorista, hindi ito lubusang makalumpo ng kanilang mga negosyo.  Ang mga malalaking negosyante ay pwedeng lumipat sa ibang bansa.  Subalit ang ordinaryong mamamayan na umaasa lamang ng income mula sa mga sahod na kanilang tinatanggap ay lalong napurnada ang buhay dahil sa pagkawala ng kanilang mga trabaho.  Resulta: mas dumami ang naghihirap at kaakibat nitong mga suliraning panlipunan. 

                Ang “kahirapan” at mga “suliraning panlipunan” namang ito ang siyang ginagamit ng mga militanteng organisasyon (legal na mukha ng CPP-NPA-NDF) sa kanilang mga propaganda laban sa Gobyerno.  Isa itong vicious cycle na kung hindi maunawaan ng lubos ay lubhang magpapaigting ng mga pampulitikang bangayan, paghina ng ekonomiya at tuluyang pagdapa ng ating Republika.

                HAMON SA AFP/PNP: Malinaw na itong “permit to campaign” (PTC) at “permit to win” (PTW) ay isang pagyurak sa demokratikong proseso, isang pagbale-wala sa rule of law at tahasang panginginsulto sa Konstitusyon ng bansa.

                Mainam at merong “focused campaign for the 2016 elections” ang AFP/PNP (Defense News Daily) laban sa extortion activities na ito!  Pero ganito na lang ba lagi tuwing election?  Alam naman natin na ayon sa batas ang pagbayad ng PTC at PTW sa mga rebelde “…can be ground for disqualification and even imprisonment if proven true.”

                Ang tanong: sa dinami-dami ng mga impormasyon hinggil sa PTC at PTW collection na ito ng mga rebelde –MERON BANG MGA KANDIDATO (NOONG NAKARAANG MGA ELECTION) ANG NAPATUNAYAN NA BUMAYAD?  Ayon sa mga report “daan-daang milyong halaga ang nalikum” ng CPP-NPA-NDF mula sa eskema na ito.  Tanong ko ulit:  bakit hindi pinapangalanan ng AFP/PNP kung sinu-sino itong mga kandidato na “bumayad” sa teroristang kilusan?  Alanganin ba ang mga kinauukulan na pangalanan ang mga ito sapagkat “malalaking isda” ang masasagasaan di katulad ng pepityuging mga snatcher na bina-bandera agad sa media?

                Berdugo man ang ibinansag kay retired MGen Jovito S Palparan (kandidato ngayon para Senador) sang-ayon ako sa kanyang sinabi na “…..ang batas ay batas at dapat ipatupad lalo na kung ito’y may kinalaman sa pambansang seguridad”.  Pakiwari ko naman, balintuna sa nararapat ang sinabi noon ni Mayor Rodrigo Duterte na “….If you pay to the BIR (Bureau of Internal Revenue), you prepare also for the NPA.” (http://davaotoday.com 10/23/2013).      

                Sa isang banda: halimbawa, inihayag ng AFP/PNP kung sino-sino ang mga bumayad ng PTC at PTW noong nakaraan at sa hinaharap na 2016 elections –magkakaroon kaya ng desaysibong pagbabago ang pag-iisip ng mga botante?

                Kasaysayan na ang sasagot sa huling katanungang ito.  Tandaan natin, ang isang aspirant for any elected position na nangangako ng resposableng kapayaan at kaunlaran ay may mulat na paninindigang tumalima sa Saligang Batas.  Ang sinumang lalaro sa apoy lamang makamtan ang personal na ambisyon ay susunog ng ating kinabukasan.###